In de bi-jnao 25 jaor dat KerkVenster besteet, zeker a’j de veurbereidingstied d’r bi-jraekent, is KerkVenster twee keer verhuusd van wark- en vergaderplek. Begonnen met gin cent in kas ginge wi-j van huus uut warken an de opzet en eerste uutgaven van dit ni-jje blad. Vake was dit ’t kantoor van ondergetekende of ’t huusadres van de metwarkers, de redactie en andere metwarkers.
Al snel blek da’w twee slaopkamers en een klein hok van Kerkstraote 2 konnn huren van de Hervormde Gemeente Aalten. Twee kleine kamers en een hok, maor daor wis onzen gekaozen secretaris, Jeep Brouwer, wal raod met. In de tussenmure van de twee slaopkamers werd een grote deurgang emaakt zodat in de ene kamer de vergader- en warktafel kon staon en in de andere kamer het kantoor werd in-ericht. Zo lek het toch ene ruumte. In ’t rommelhok werd een kleine kökken emaakt veur de koffie en thee a’w daor an’t wark of an’t vergadern waarn en de rest veur opslag van wa’w neet direct neudeg hadden.
Varven, behangen, timmerwark enz. he’w zelf edaone want geld was d’r nog neet. Met afgedankt kantoormateriaal van de gemeente Aalten he’w alles in-ericht. Van ’t eerste geld wa’w spontaan binnenkregen he’w allene de wark- en vergadertaofel met acht steule ekocht, bi-j zo’n opkoper van kantoormeubilair.
Arjan Ligtenbarg, de opmaker van het blad, warken in eerste instantie nog met zien eigen computer en een tweedehandsjen he’w ekocht veur de administratie van de penningmeister en de bezorgadministratie.
Kortum, het was soms behelpen in ’t begin maor wi-j konnn wal beginnen um d’r een mooi blad van te maken.
Toen de eerste geldwerving werd ehollen vroge wi-j dan ok um een ‘steunpilaar’, een eenmalige gift um fatsoenlek spul an te schaffen veur de administratie en de opmaak van het blad. Tut onze grote verbazing zegden de gemeenteleden maor leefst iets meer dan f. 42.000 too. Zo konne wi-j twee goeie computers anschaffen, ene veur de opmaak en ene veur de bezorg- en financiële administratie en een printer. Wi-j waarn de koning te rieke.
Onder onze warkplek zat ’t kerkelek bureau van de Hervormde Gemeente en deur ‘t samengaon met de Gereformeerde Kerke in 2006 kwam de tweede verhuzing in zicht. Angezien de ruumte bovven toch wel wat an de krappe kante was hef het bestuur en de redactie evraogd of wi-j naor de benedenruumte moggen. Dat moch en zo brak der weer een tied an van oprumen, inpakken, alles naor beneden sjouwen en het kantoor inrichten. ’t Mooi van dee ruumte was ok dat er een klein kökkentjen in zat. Zo hadde wi-j alles bi-j mekare in ene ruumte.
De ni-jje ruumte werd ok gebruukt deur de penningmeester, het bestuur vergadern daor, soms werden d’r interviews af-enommen, of was der ovverleg ovver een ni-j artikel. Kortumme, het was een heerleke plek um te vergadern, KerkVenster op te maken of de administratie bi-j te hollen. Ok de bezorgadministrtatie maken gebruuk van de plek en natuurlijk het bestuur en de redactie van KerkVenster en de websitecommissie.
En dan komt recentelek de kerkrentmeesters met een veurstel um van de oorspronkelijke kösterswoning weer een woning te maken. Geen gek idee want de woningnood is groot en alles zit in dee ruumte wat een (klein) gezin of stel neudeg hef. Het bestuur en de redactie van KerkVenster wol dan ok wal metwarken an een volgende verhuzing mits d’r een goeie ruumte te vinden was um in te warken.
Daor was deur de kerkrentmeesters al ovver nao-edacht. Ze boden an um naor de bovvenzaal 3 van gebouw Elim te verhuzen. Alle belanghebbenden konnen zich daor in vinden.
En zo is recentelek met vereende krachten van bestuur en coördinatoren de verhuzing gerealiseerd naodat de zaal was an-epast um te gebruken veur de vergaderingen van bestuur en de redactie, veur de opmaak van het blad en de website, de coördinatoren, de bezorgadministratie, het archief en de penningmeister.
Zo is een ni-jje werkplek ontstaon waor hoppelek nog völle KerkVensters word veurbereid en op-emaakt. As ’t beschikbaore budget in de gaten word ehollen dan kan ’t in de toekomst ’t communicatiecentrum worden van de kerkelijke gemeenten Aalten en Bredevoort.
Met een kleine 250 metwarkers is ’t de grootste vri-jwilligersorganisatie binnen de PG Aalten en PG Bredevoort en wee wet, häökt d’r in de toekomst nog wal meer gemeentes an, want het word steeds moeileker um geschikte vri-jwilligers te kriegen veur dit wark.
Tekst: Arnold Arentsen Foto’s: Harmien Wensink